By Gereformeerde Skool Dirk Postma glo ons dat onderwys nooit neutraal is nie. Elke vak, elke les en elke gesprek vorm die manier waarop ’n kind na die wêreld kyk. Daarom kies ons bewustelik om alles te bou op die Woord van God, en nie op sekulêre of humanistiese filosofieë nie.

Dit beteken dat ’n kind leer om die skepping te verstaan as die werk van ’n lewende God, en nie as die toevallige uitkoms van ’n doellose heelal nie. Ons leer leerders om krities te dink, om die wêreld se idees te toets aan die Woord in plaas daarvan om dit sonder meer te aanvaar.

“Die vrees van die Here is die begin van kennis.” (Spreuke 1:7)

’n Christelike wêreldbeskouing raak elke area van die lewe: hoe leerders na hulle liggame kyk, hoe hulle ander behandel, en hoe hulle na gesag, gesin en die skepping kyk. Ons doel is dat elke leerder sal groei in die besef dat God soewerein is oor alle dinge, en dat alles wat hulle leer en doen, tot Sy eer moet wees.

Hierdie beskouing word nie net in die klaskamer geleer nie, maar ook prakties uitgeleef in die hele skoolgemeenskap: in die verhouding tussen onderwyser en leerder, in die manier waarop konflik hanteer word, en in die waardes wat op die speelgrond geld. So ontwikkel kinders met ’n samehangende verstaan van die lewe, waarin geloof nie apart staan van skoolwerk of alledaagse keuses nie, maar alles deurdring.

Besoek ons by www.gsdp.co.za of skakel ons vir ’n informele gesprek oor hoe ons saam met u u kind kan toerus vir ’n lewe tot eer van God.

Seëngroete
Gereformeerde Skool Dirk Postma