+27 12 332 3222 | [email protected] | Cunninghamlaan 1182, Waverley, Pretoria, South Africa

Doen aansoek

Visuele Kunste

God het die mens na sy beeld geskep met ‘n aanvoeling vir die estetiese en die vermoë om kunswerke te kan waardeer en kuns te kan beoefen. Kuns is ‘n kultuuruiting en in kuns is daar noodwendig altyd die estetiese teenwoordig. Fil 4:8 is duidelik oor hoe om met die estetiese om te gaan. “Verder broeders alles wat rein is, alles wat lieflik is, alles wat loflik is – watter deug en watter lof daar ook mag wees, bedink dit”. Kuns as kultuurskepping moet dus aan die norme van die Skrif voldoen. In uitvoering van sy kultuuropdrag het die mens ‘n verantwoordelikheid teenoor God, al het die mens redelike vryheid van uitdrukking ontvang. God het ‘n welbehae in ‘n kunstenaar wat hom hou by Bybelse norme.

In Kuns by GSDP leer die leerlinge ook wat is algemene onaanvaarbare beskouings van kuns en word hul ook geleer hoe om dit te beoordeel.

Visuele Kunste is ‘n opwindende en dinamiese vak wat leerlinge in staat stel om verskillende kunsvorme te verken, te skep en krities te ondersoek. Die doel van die Visuele Kunste-kurrikulum vir graad 10 tot 12 is om leerlinge se artistieke vaardighede te ontwikkel, hul begrip van kunsgeskiedenis en -teorie te verdiep en hul vermoë om idees visueel oor te dra, te bevorder.

Inhoud/hooftemas vir graad 10-12

In wese bestaan die vak uit twee komponente: ’n Praktiese komponent waarin selfuitdrukking, kreatiwiteit en oorspronklikheid ontwikkel word. Die praktiese komponent word opgedeel in twee hoofvaardighede, naamlik konseptuele denke en ontwikkeling asook tegniese vaardighede waarin die skep van 2D en 3D kunswerke deur middel van verskillende teken-, skilder- en beeldhoutegnieke bevorder word. Die tweede komponent van kuns is Visuele Kultuurstudies, waarin die ondersoek, insig en kritiese interpretasie van kuns bevorder word deur die verkenning van spesifieke bewegings, tydperke en invloedryke kunstenaars. Die hoogtepunte van die vak Visuele Kuns is die retrospektiewe uitstalling wat jaarliks plaasvind en ’n oorsig gee oor die leerling se ontwikkeling, kritiese denke en tegniese vaardighede asook die jaareindeksamen wat opgedeel word in ’n praktiese eksamen en ’n teorie-eksamen.

Vaardighede wat ontwikkel word

  1. Ontwikkel kritiese denke Leerders moet navorsing doen, vrae vra oor ‘n verskeidenheid van temas en leer om hul eie opinie daaroor te ontwikkel. Die vak is gegrond in analitiese denke en abstrakte konsepte en een van die mees positiewe aspekte hiervan in Dirk Postma, is die geleentheid om hierdie ondersoek juis vanuit ‘n Christelike perspektief te kan doen.
  2. Ontwikkel kreatiewe probleemoplossing Die vak verwag lang ure en toewyding, aandag aan detail en volharding. Hierdie kenmerke van die vak gee ’n unieke geleentheid om leerlinge uit te daag om kreatiewe oplossings in hul werk, maar ook in hul uitvoering van hul opdragte, te soek.
  3. Ontwikkel emosionele intelligensie Leerlinge moet onafhanklike besluite neem, selfkrities wees, hulleself blootstel wanneer hulle ‘n kunswerk tydens uitstallings moet voorlê en kommunikasievaardighede aanleer om die boodskappe wat hulle wil oordra, te kan verbaliseer.
  4. Ontwikkel insig in sosiale kwessies Kuns ondersoek die mens en die samelewing op soveel verskillende vlakke en spreek konsepte wat soms moeilik is om te verwoord aan en help daarom ook om empatie te ontwikkel vir die  kompleksiteite en diversiteit van ons samelewing.

Studie- en beroepsmoontlikhede

Alhoewel Visuele Kunste nie ’n vereiste is vir enige studierigtings nie, is beroepe wat in kreatiewe velde gevind word ontsettend mededingend, wat beteken dat ’n goeie en sterk basis in die kunste belangrik is vir enige leerling wat in hierdie velde sou belangstel. Voorbeelde van beroepe in die kunswêreld sluit in:
  • Professionele kunstenaars en illustreerders.
  • Ontwerprigtings soos digitale ontwerp, modeontwerp, binnenshuise ontwerp, juweliersontwerp, stelontwerp ens.
  • Web-, film-, animasie- en ander digitale vervaardigers.
  • Kunshistorikus, kurators, kunskritikus en ander teoretiese vakspesialiste.
  • Argitektuur, landskapsargitektuur en stads- en streekbeplanners.

Vinnige skakels

Hulpbronne

  • Taalbeleid
  • Riglyne: Gebruik van kunsmatige intelligensie en sosiale media
  • Gedragskode

Videos

Doen aansoek

+27 12 332 3222 | [email protected] | Cunninghamlaan 1182, Waverley, Pretoria, South Africa