God het verskillende lewensterreine geskep, elk met sy eie plek en gesag. Die gesin, die kerk, die skool en die staat is nie maar net menslike instellings wat ons self uitgedink het nie. Dit is deur God ingestel, elkeen met ’n eie taak.

Hierdie gedagte staan sterk in die gereformeerde tradisie. Dit word sfeer-soewereiniteit genoem. Dit beteken dat geen sfeer die ander mag oorheers of vervang nie. Die staat is nie die kerk nie. Die skool is nie die gesin nie. Elkeen het sy eie grense, gegee deur God self.

Die gesin is die eerste sfeer wat ons in die Bybel sien. God het die huwelik en die gesin by die skepping self ingestel (Génesis 2:24). Ouers het die opdrag om hulle kinders op te voed in die tug en vermaning van die Here (Efésiërs 6:4). Hierdie verantwoordelikheid kan nie aan iemand anders oorgedra word nie. Dit bly die ouers se taak.

Die kerk is ’n ander sfeer, met die opdrag om die Woord te bedien, die sakramente te bedien en gelowiges geestelik te versorg (Matthéϋs 28:19-20). Die kerk staan nie onder die gesag van die staat of die skool nie, en omgekeerd ook nie.

Die skool is weer ’n eie sfeer met ’n eie taak: onderwys. Maar hierdie taak staan nie los van die gesin en die kerk nie. Die skool werk saam met die ouers, ondersteun wat in die huis en in die kerk geleer word, en bou daarop voort. Spreuke 22:6 sê ons moet ’n kind opvoed volgens die pad wat hy moet loop. Dit is in die eerste plek die ouers se verantwoordelikheid, en die skool help hulle hiermee.

Dit is belangrik om te onthou dat die skool nooit die plek van die gesin of die kerk kan inneem nie. ’n Skool kan nie vir ’n kind preek soos ’n kerk nie, en kan ook nie die intieme verhouding van ’n gesin vervang nie. Die skool se rol is ondersteunend en aanvullend, nie vervangend nie.

Wanneer elke sfeer sy eie plek inneem en sy eie taak verrig, sonder om ander sfere oor te neem, funksioneer die samelewing soos God dit bedoel het. Dit is waarom ons by GSDP waarde heg aan goeie samewerking met ouers en kerke. Ons sien onsself nie as vervanging vir die gesin of die kerk nie, maar as medewerkers wat help om kinders op te voed binne die raamwerk wat God self daargestel het.

Besoek ons by www.gsdp.co.za of skakel ons vir ’n informele gesprek oor hoe ons saam met u u kind kan toerus vir ’n lewe tot eer van God.

Seëngroete
Gereformeerde Skool Dirk Postma