Rekenaartoepassingstegnologie (RTT) is ‘n vak wat binne die raamwerk van die kultuurmandaat van Gen 1:28 val, naamlik die beheersing, bewerking en bewaring van die skepping. Die ontginning van die moontlikhede van die skepping is dus nie ‘n willekeurige menslike aktiwiteit nie, maar ‘n plig asook ‘n mandaat wat aan die mens gegee is.
Net soos alle menslike aktiwiteite, het die ontginning en benutting van tegnologie besliste gevolge, goed en sleg. Hulpbronne en tegnologiese moontlikhede van die skepping moet vanuit ‘n christelike lewens- en wêreldbeskouing verstaan en toegepas word. God moet deur die gebruik van tegnologie geëer word, die naaste daarmee gedien word en die skepping daarmee opgepas word.
Rekenaartoepassingstegnologie het ten doel om die digitale kloof te oorbrug. Dit word vermag deur die leerders se vaardighede in die gebruik van hardeware en sagteware te ontwikkel. Leerders leer hoe om alledaagse probleme op te los – in die proses word die onderskeie vaardighede wat die eindgebruikers aangeleer het, benut. Dit sluit die prosesse van inligtingsbestuur en –kommunikasie in, deur die toepaslike gebruik van IKT (Inligtings- en kommunikasietegnologieë). Rekenaarvaardigheid is ‘n noodsaaklikheid in vandag se samelewing en hierdie is ‘n geleentheid vir elke leerder om voor te berei vir die lewe na skool.